Nino amon me wilobo (8 me dwe me Adek) obedo kwer ame timere mwaka imwaka ikin mon me lobo obedo omemba me lobe onote    dok nino man ojalo acalo nino me weo I Uganda kede ilobe okene apol me wipodo.

Jo yee ni inino man mon kwero kwo tute gi i kare okato kede kare ni ikom (dongo lonyo, wibye kede tic pi lwak)eka dang ote kuko duru pi miti gi. Ikare okato coo onwongo tye kede kede twero adwong olil ikom mon ikabede ame gin otelo ikop ikom moko tam kede jami okene apol ame eka adwogi mere te weko pe bedo kede ginoro icingi bala coo eka awobe apol te coye pi kwan ote weko anyira ooko.  

Pen kop me mwaka ni onwongo tye ni kubo anyira, kelo kero me anyim. Penkop man tye pi loko wi jo ducui kelo kero me twero arorom, ngol atira dongo lobo kede kuc iyi anyim.

Pol onywali me Uganda itedero kede boma kwero nino man idistrike gi apapat ento me Apac imwaka 2012 ni otela abumente me tedero okony kor gi idongo lobo apapat okwero megi Aduku town council ame tye Ikwania kun bedo ilek adwong me cukul UCC Aduku acalo rik obin omoko me loloko ka kwer man igombola ducu ame tye Apac wek mi kare bot otedero polere mon me bedo akom gi kede jolo nino man acalo me gi.

Ikare me kwer man jami apol obedo timere bala lok otela apapat, wer myel kede tuko goga ame otino me cukule mogo kede mon atye ikwer man oyiko kun pol akwena gi onwongo tye ikom adwogi abeco ame tute amon okelo ka oporo kede kare okato eka ote dolo kede pyem gweyo odilo ikin mon kede co.  

Yuba magi ducu obedo cwalo cutu cutu iwi yamo kun beo I Radio me tedero aryo ame tye Apac (Radio Divine kedeRadio Apac)kun tam me keto iwi yamo onwongo tye mi miyo jo ape obedo ikare kede gi wot ika kwer winyi ngo atye atimere Radio.

 Ikom kop ame obedo kobere iyi icuban man onwongo tye ni pacen 60 me anyira weko kwan oko pien ope iyore kede ka gwoko lengo me kom gi ikare me twoyo two dwe alubede kede lok a dici(CAO) me Apac Andrew Leru ame oloko akawang otic me distrik.

Wonkom 5 me Apac adit Okae Bob ote medo ni mano ka distrik onwongo cente moro obino neon ni otio kede me gero wudi mogo opore icukule ducu wek kony anyira me loko pali kede bongu gi ka olile itwo dwe wek mi kero bot anyira me wot ikwan.

En omede ni mano man bino jingo cuny anyira me keto cuny gi ikilaci te kwayo onywal me bedo  acok anyira gi kun ojalo gi cing gi ananoko bot anyira wek cukoro cuny gi me mede ikwan. 

Pwod ite kopo mon me Apac obin ocao atek tim me mite aluc (ico butu ico) kun okwao co me giko kodi tim man oko pien pe obedo yore ame Obanga rik ocweo I dano kun dwon man okato ibot wonkom Adek me Aduku.

Ilokere idolo kwer me nino man, welo me awora ame dang obedo acungo amon me Apac I ot moko cik imat Lucy Ajok obin okwao onywal me bedo karacel kede otino gi polere anyira eka ote tiyo tic gi acalo onywal kun dang omio gi bedo acok ikanica pi ngeyo Obanga.En ote dolo kopere icukoro cuny anyira me mako kwan atek kun kwao onywal me neon ni okonyo gi.

Ikin jo obedo atye ikwer man onwongo tye iye ocungo I ot moko cik ducu oya Apac,Okanycila me distrik, otic agamente, okawang dule ape jengere ikom gamente,otela dini, tekwaro, otino kwan kede gurupe amon apapat ikin jo okene ame omoko caden inino man.

Acoc Mercy Apio Ogema

Abwo keto lok me – KIC

Kubere Information Centre

Polota 60/62 Iyo Cuk

P.o Box 154Apac, Uganda

Cim: +256782972470

E-mail: This e-mail address is being protected from spambots. You need JavaScript enabled to view it / This e-mail address is being protected from spambots. You need JavaScript enabled to view it